Saturday, April 13, 2024
Niz Goenkar
Latest News

Benett Paes- Ek Gunnest Boroupi – Bor: Isidore Alexander Dantas
Monday - Mar 11, 2024
Benett Paes- Ek Gunnest Boroupi – Bor: Isidore Alexander Dantas
Benett Paes hannem borovpi mhonn nanv melloilam. Tacho zolm Saxttichea Osollnnem ganvant Marsache 7ver 1933 vorsa Tomas Aquino Benito Pais nanvan zalo. Tachem mullavem xikop Purtugezintlean Segundo Grau, uprant Osollnnechea St Anthony iskolant Inglixint zalem. Uprant to Belgaumchea St Paul iskolant xikunk gelo ani thoinsor tannem SSC porikxa pas keli.
 
Mumbointlea St Xavier, Punneantlea Nowrosjee Wadia, ani Belgaumchea R.P.D. kolejimni tannem fuddlem xikop kelem. Eka Mumbointlea ixttan taka Kuwait vorpak bhas diloli. Bapain ti euzonn nakarli ani fuddlem xikop Purtugezintlean Liceu korunk suchoilem. Punn tachea ixttan bhas diloli ti pall’lli ani tannem taka visa patthoitoch taka Kuwait xarantlim daram ugtim zalim.
 
Chovis vorsanche piraier taka ek vhoddlea ud’dear eka nanvostea komponen nokri bhettli ani to ud’do Personnel Manager-acho aslo. Hangasor taka jivitant upies ani ies gattunk mell’llem. Hea zagear tannem so vorsam sarlim ani novea ud’dear vochpak toiari keli.
 
1970 chea doskant, Kuwait desan apli udorgotichem pavl ghatlolem. Hachi sondi ghevun to thollavea vepaream khatir pordexi bhagidar sodunk laglo. Ani xevttim tachea borea noxiban taka ek Londonacho bhagidar bhettlo. Dogainkui ek vhodd mhal purvonn korpachi magnni mell’’li. Ti mhollear Kuwaitchea poilea bhov mallianchea mottoranchea ‘park‘-a khatir bandkamacheo vostu purvonn korpachi asli. Hea kama khatir taka zaiteoch bhonvddeo marcheo poddleo ani xevttim ti koblat soi keli.
 
Hea rattavollint taka boroch onnbhov gattunk toxench mottea pordexi vepareanchea ghoranchea malkank bhettunk sondi mell’lli. Punn sogllench khuxal asunk na. Hea modekat tachea ekleach putak mottoracho obsoeg zavn to devadhin zalo ani tachea putachi voizki podvi mellpachem sopon xarti pavunk zalem na.
 
Oxim, tannem sotechallis vorsam pordesant sarlim ani tea uprant to aplea ganvghora Osollnnem 2016 vorsa portolo zoim tannem lamb kallacho haves- borovpam korpacho xarti pavoilo. Hem kortana to boroch kall boro naslo ani tantunt anik ek dukh mhonnche tachea ghorkan’nicho sorgvas zalo.
 
Taka sfurt divpi tacho sorgest bapui Bonifacio M.Pais ani tacho role model famad udegpoti Ratan Tata zavn asat.Tachea jivitantli boreantli ghoddnni tachem kazar Lalita I. Pinheiro kodde zavop zavn asa.Eka mottorachea obsoegan tachea putachem moronn tachea jivitantli vaitt ghoddnni zavn asa.
 
Tacho favil’lo vell to dhadosponnank boroita ani vell sarunk gaita. To borovpa kodden koso vollunk pavlo tachi kanni oxi asa: Jen’na Amerikecho Raxttrpoti Sorgest John F. Kennedy hacho 1961 vorsa khun zalo, to ekdom akantunk pavlo.Tea kallar to Kuwait desant aslo ani to tachi khub tokhnnai kortalo. Tacho bapui zo Goeam aslo tovui taka tokhetalo. Hea khatir Benettbaban aplem hem dukh aplea bapai kodden vanttekari zatolom mhonn ievjilem. Hea khatir tannem ek lambdig chitt, hea vixim aplea bapaik boroili. Tachea bapain bhavna vanttekari zalo dekhun tache dinvas atthoile ani tum itlem borem boroita mhonn apunn nokllo aslom mhollem. Hi tust aplea bapai koddlean mellop, taka umed bhorunk pavli. Hea vorvim tachim don pustokam zolmank ailim.
 
Poilem pustok jem tannem khaxa porgottlem tachem nanv ‘Simply My Way’ (2011) jem tannem aplea sorgest bapaik orponn kelam ani dusrem Love ‘n Share It (2017) aple potinink bhettoilam.
 
Tachem poilem pustok, upkhonddantlea lokachea dusrea desant stholantor zavop ani tacho probhav fattim urlolea lokacher koso zata, tacher bhor ghalta. Tantunt borovpeachea mullancher niall kortana, to aple Goeantle ani pordesantle donui onnbhov sangta. Hem pustok dhaddxi udegponn, guntovnnukecheo ievzonn, probhavi khorchacheo jairati, utponachem noveo ievzonni ani sabar goxtti iskuttaita.Dusrem pustok mog, nad, vinod, karosthan, zatinche bhed, ghorchim zhogddim, kazaranche prosong, soddchitt, ukhlun vhorop, khun, kaidexir upai ani porot mellop, hancher bhor ghalta.
 
Goenchea vixoia voir sabar pustokam asat jim Goenchea somajik,rajki vo dhormik sonskruticher adarit asat. Tachim donui pustokam hea vixoiank kosleai toren hat ghaltat dekhun Goem Sorkarachea Kola ani Sonskrutik khateant tim viktim ghevun sogllea jil’leanchea vachnaloiank vanttleant.
 
Hea tachea vavrak amchi xabaski

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields