Saturday, April 13, 2024
Niz Goenkar
Latest News

KID BOXER- Ek Gunnest Tiatrist – Bor: Isidore Alexander Dantas
Saturday - Feb 17, 2024
KID BOXER- Ek Gunnest Tiatrist – Bor: Isidore Alexander Dantas
Aiz famad fokanner sorgest Kid Boxer hacho zolm dis. Tea nimitan tacher boroilolo lekh tumkam vachunk ditam.
 
Kid Boxer hea tiatristan khoddegant kantaram gavpant toxench vinodi patr korpant nanv melloilam. Tacho zolm Bardezantlea Siole ganvant Caetano Manuel Pereira nanvan Fevrerache 17ver 1917 vorsa zalo. Tachea bhurgeponnantlea mosteponnak lagun taka Kid Boxer hem nanv laglem. Solla vorsanche piraier to Mumboi stholantor zalo ani survatek eke gerejin kamank ravlo, Tea uprant eka hotellant ani xevttim Central Railwaynt tannem ekvis vorsam nokri keli.
 
Nanvadik tiatrist Ernest Rebelo hachea Bombainchi Istil nanvanchea tiatrant tannem kantar gavun tiatrant survat keli. Hem tachem kantar lokak avoddlem ani hea khatir to uprant her tiatramni disunk laglo. Tannem gazlolea tiatr digdorspeam khatir kam pollelam zoxe porim Pai Tiatrist, Ernest Rebelo, J.P. Souzalin,Andrew Fernandes, Saib Rocha, Miss Julie, Miss Marilin, Miss Carlota, Dioguinho de Melo, Minguel Rod, Champion Alvares, C. Alvares, Anthony Mendes, Alfred Rose, Remmie Collaso, Johnny Batlu, Anthony Too Loo ani her.
 
Young Menezes, Minguel Rod sangata tannim ek tikttem (trio) rochlem zaka nanv Kid-Young-Rod dilem, Hem tikttem kantarank lagun bhov famad zavnk pavlem. Tachea kantaranchea utrank kherit orth aslo. Tachi ani famad tiatrist Alexinho de Candolim hanche modem kantaranchi birea choltali ani te ekamekak zupatti ditale punn hem sogllem ritrovisechem astalem punn khoreponnim te ixtt asle. Tannem borovn digdorxit kelolo poilo tiatr Ostori zavn asa.
 
Tachea her tiatranchim nanvam Editor Ponch de Bombaim, Ankvar ani Kazari, Zata tem Boreak, Bhoinn, Militar, Zulum, Amchim Natalam, Goa, Bankruttan Bankrutt, Fuddar,Mhozo Oprad, Kidachem Sopon,Adeus vo Nimanni Bhett. Rajkaronna voir to kantar kortalo ani Robin Vazachea Agent Monteiro tiatrant tannem toslem kantar kelem ani hea khatir taka Goenchea eka suttke zuzarean ottok korun bondkhonnint ghatlo.
 
Oslea kantarank lagun taka Mumboi thaun Goeam toddipar kelo. Goeam astana to ten’nachea Emissora de Goa hantunt Jacinto Vaz ani Allen Costa hanchea sangata reddiochea kariavollimni bhag ghetalo. Goenchi soddvonn zalea uprant to porot Mumboichea tiatrant nesonk laglo. Amchem Noxib hea Konkani cholchitrant to ek vinodi bhumika kortana dista.Tachea atmeank xanti labhum.

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields