Friday, June 21, 2024
Niz Goenkar
Latest News

Dr. Manohar Rai Sardesai - Ek Utkruxtt Sahitik – By Isidore Alexander Dantas
Saturday - Jan 20, 2024
Dr. Manohar Rai Sardesai - Ek Utkruxtt Sahitik – By Isidore Alexander Dantas
Aiz famad kovi ani sahitik sorgest Dr. Manohar Rai Sardesai hacho zolm dis. Tea nimitan tacher boroilolo lekh tumkam vachunk ditam. Dr Manohar Rai Sardesai hannem kovi, borovpi mhonn nanv zoddlam Tacho zolm Ponnjent Janeracher 18ver, 1925 vorsa zalo. Tacho bapui Laxmanrao ho ek famad mottveo kanneo borovpi asl0. Hea fattbhuincher to Ihanponninch borovpak laglo.
 
1942 vorsa tannem Matric pas korun 'Bharot Chhoddo' chollvollint bhag ghetto. Tannem Master of Arts podvi French ani Moratthi bhaxent ghetli zoim Mumboi Vixvvidheapitthant to poilea vorgant poilo ailo. Uprant tannem Mumboichea Wilson kolejint French Bhaxeche 'lecturer' koxem kam pollelem. French sorkarachea xixvruticher to Parisak gelo. Paris Vixvvidheapitthachi tannem French bhaxent Doctorate melloili. 1960 vorsa to All India Radio (External Services) hantunt vavrunk laglo.
 
1962 vorsa tannem Moddganvant 8ve Konkani Porixodeche iezmanponn choloilem ji porixod Goenche soddvonne uprant poili porixod zavn asli. 1964 vorsa to Goenchea Konkani Bhaxa Monddollacher iezman zalo. Tannem 1966 vorsa University Teachers Association ghoddlo. Taka Janerache 11er 1966 vorsa Konkani Koviraj venchun kaddlo. 1973 vorsa taka Zaio Zuio kovite khatir Goa Konkani Akademicho puroskar divpant ailo. 1977 vorsa te xixvrutecher Rusiek bhett divpak gele. 1979-1985 meren Mumboi Vixvvidheapitthache to French Bhaxecho 'Reader' aslo.
 
Pisollim hea tachea kovitek 1980 vorsantlo Sahiteo Akademichem tosrip labhla zantunt obhimani udgar mellttat. 1985 tern 1982 meren tannem Goa Konkani Akademichem Up-Iezmanachem pod duxoilam. Konkani Vixvkox hacho teo Mukhel Sompadok aslo. French sorkaran taka 'Chevalier De L'Ordre Des Palmes Acdemiques' ho kitab divun sonmanit kela. 1997 vorsa Goeant zalolea Goa State Film Festival hantunt taka Shitu telefilma khatir borim kantaram ghoddpa khatir inam favo zala. 2000 vorsa taka Goenchea Kola Akademicho Gomant Sharda Puroskar divpant aila.
 
Tachem iskolachem xikop Moratthi ani Purtugezint zalem kiteak tea kallar Konkanik ek boli koxe lekhpant ietalem ani Purtugez hi Goenchi odhikrut bhas asli. Moratthi khasgiponni xikoitale ani French dusri bhas asli. Tancho bapui svotontr chollvollint ghuslolo aslolean to eksarke bondkhonnint io-voch kortale zaka lagun Manoharbabak kam korpak poddlem.
 
Tacheo gazloleo kovita "Aiz re dholar poddli boddi, Goem Tujea Moga Khatir, Zaiat Zage, Bebeanchem Kazar, Zaio Zuio, Ailo Pol, Hi Lokxai, Goenchea Mojea Goenkaramno, Hundranchi Sobha, Pixim Podam, Bhangrachi Kuradd, Mannkulim Gitam, Bhava Tuka had asa 18 Junh..." aspavtat.
 
'Goem Tujea moga' khatir hantunt amkam jhelpi madd, bhatachim xetam, bhangralleo vello, dhove ghosghoxe hanchem surek vornnon melltta. Bebeanchem Kazar bhurgeank ek akorxok iomok (catchy rhyme) dita, `Zaiat zage' amkam zagrut korta. Ailo pol hem vinodan amkam nivoddnnukechea vellar keloleo bhulgavpi bhasavnneocheo gozali sangta. Hi lokxai rajki dekhaveacher chabuk marta tor 'Hundranchi sobha, khoreponnachi Goenchea poile vidhan sobhechi ek rajki ghoddamoddinchem veongchitr zavn asa. 'Zaio Zuio' ek kovitanchi punji asa zantunt amkam totvginean sampoddtta. 'Bhava Tuji lad asa' 18 Junh amkam Dr. Manohar Lohiachi Moddganv bhettechem vornnon korta zoim Goenche soddvonnek ut'tejon mellunk pavlem. Godio (prose) modem "Amchi Bhas Amkam Zai, Xennoi Goembab, Kallo Buklo, A History of Konkani Literature" tanchem Yogdan asa. Tannim boroilolea nattkamchi nanvam "Smuggler, Biradd Bodol'lem, Jaducho Komblo" asat. Tannim sabar bhaxantoram keleant tantunt "Devachim Utram, Candide, Ailem Amchem Rajio, Vivekananda, Utram, Of the Cause of Lucid sleep or study of the nature of man" (lnglix) aspavtat. Tannem sompadon kelolim An Anthology of Modern Konkani poems, Svotontr Goeanntli Konkani Kovita asat. 2004 vorsa tannem English Konkani Devnagri lipient sobdkox uzvaddailo.
 
Tachea 'Sobit Amchem Goem ani Fulam Zai' kantarank sorgest Frank Fernand hannem HMV kompone khatir songit bosoilam. Mumboint Devnagri lipient uzvaddailolea 'Sad' masikache to poilo sompadok aslo. Tache kovite bodol, Goenchea sonskrutechea ani rajki ghoddnneachem teo ek poddbim zavn asa oxem mhonnpant ailam. "Zoim hanv vetam, thoim hanv rogtant dagailoli mati, dhunvran bhorlolea dongurleanchem mone rudan, Zuari noditlea dukant bhorlolim Iharam vhortam", oxem te mhonnttale. Tanhean Goenchea prekxokam fuddeant kovita vachunk vo gavunk zatali ani konnakui hansovnk vo roddovnk vo moneponnant xabaski divnk zatalem. Tachi kovita Goenchea ani lokachea kallzant nitt ghustali.
 
Jivit Amchem Oxem' hea Konkani filmant tannem iogdan kelam. Hea filmank tannem sorgest Felicio Cardoso hachea sangata mhotvacho vavr kela. Felicio baban adari digdorspi mhonn kam pollelam tor Dr. Manohar hannim tantunt panch kantaram rochleant zanchim nanvam "Apoi Maka, Jivit Amchem Oxem, Ang Mhojem Choi, Mojea Monant ani Lhara Lharar." Hea kantarank Vijay Basker hannem songit bosoilam ani tim P. B. Srinivas, S. Janaki, Anjali hannim gaileant. Junhache 22ver, 2006 vorsa to devadhin zalo. Tachea omor vavrak amcho solam.

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields