Wednesday, February 28, 2024
Niz Goenkar
Latest News

Fr. Vasco Do Rego – Ek Gunnest Gaionam Ghoddpi – Bor: Isidore Alexander Dantas
Sunday - Jan 14, 2024
Fr. Vasco Do Rego – Ek Gunnest Gaionam Ghoddpi – Bor: Isidore Alexander Dantas
Aiz famad padri sorgest Fr. Vasco do Rego hacho zolm dis. Tea nimitan tacher boroilolo lekh tumkam vachunk ditam.  Fr Vasco do Rego hannem Konkani gaionam rochun Konkani bhaxek girest kelea. Tacho zolm Ponnje Janeracher 8ver 1925 vorsa zalo, Survatechem xikop Purtugezint korun uprant tannem Latin ani Inglix bhaso xikun kaddleo. Vis vorsanche piraier tannem Jezuit sonsthent proves kelo. 1952 tem 1956 vorsa meren to Devxastrachem xikop korunk Belgium gelo ani 1955 vorsa Agostache 15ver taka iadniki makhnni favo zali.
 
Belgium astana 1952 vorsa jen’na Natalancho somarombh aslo ten’na thoim aslolea veg vegllea desanchea xikpeamni aplea bhaxentlem Natalanchem git gavpak prosong ailo. Konkanint tea vellar ekui Natalanchem git naslolean taka loz disunk lagli. Haka avhan divpak tannem Konkani gaionam rochpachem avhan svikarlem. He porim poilem Natal git tannem rochlolem Visvasacho Dis amkam favo zalem jem tannem Igorjechea panvddeancher bosun boroilolem aslem.
 
Gaionamcho Jhelo hem Konkani sevadhormik gitanchem pustok toiar korunk tannem 300 odik gaionam rochlim ani zaitea gaionank nadui dilo. Soglleant pornnem Konkani nemallem Dor Mhoineachi Rotti hea masikacho sompadok mhonn tannem 2009 vorsa savn 2019 voros meren kam pollelam. Belgium savn 1957 vorsa to portolo ani panch vorsam Punneant vavurlea uprant 1963 vorsa Raiturche seminaricho Atmik Guru mhonn taka nemlo ani iadnikank Sevadhormik Retir divnk tannem porvangi magli.
 
Vatikanache dusre vixvsobhen Povitr Mis avoi bhaxent zavpak porvangi dili. Tea khatir misachem mha-prarthon ani manddavoll Konkanint korunk tannem Bisp Saibachi maneotai ghevn mis Konkanintlean bhettovnk survat keli. Hem novem mon padrim modem ximpddavnk ek ekantaiecho dis tharailo. Latin bhaxent aslolo Romi Misa-Gronth, Mungllurchea Fr..Filipe Nazareth hachea zodd-palvan Konkanint bhaxantorailo. Vachpa-Gronth sudarunk ani topasunk taka nempant ailo.
 
Basilikecho Reitor astana, novenachea disamni khas vixoi toiar kortalo ani sermanvacheo proti padribhavank vantt’ttalo. Thomas Stephens Konkani Kendr, Porvorim he sonsthecho to sonsthapok monddollacho vangddi aslolean tache he sermanv ektthaim haddun Sonvsarak Jezu Diat hem pustok uzvaddailem.
 
Povitr Pustok toiar korpache somitint aspav astana, Izaias provadeachem pustok, Juanvachem xubhvortoman, Pedruchi ani Juanvachi Chitt; hem Fr. Caetan Cruz hea iadnika vangdda tannem bhaxontoracho vavr kelo.
 
Konkani xallecho prochar korunk tannem Goeant zaitech ganv ani xaram maddoilim.. Mullavem xikop Konkanint korchem, hea khatir khub vavurlo. Loyola iskolant poilea vorsa don vorg suru kele ani 5 vorsamni tanchea proiotnak foll mell’llo. 1965 vorsa tannem Novo Korar hea nanvan 2 lhan pustika toiar keleo. Hantuntlean voros bhor misachi sarki somzovnni divnk tannem proiotn kelo.
 
Mataji Nirmala hichea sangatan goribam pasot toxench sanddloleam ani konn nasloleam pasot zaiti seva keloli asa. Ishaprema Niketan hi Devak somorpilolea Tainchi novi sonstha ghoddli zache fantte amkam Goa Velha, Asaganv ani Punneant asat. Somajik oneaiacher virudh loddai korunk zoxe porim Meta Strips karkhanno, Nylon 6.6, Konkonn Relve tannem hatbhar laila.
 
Sonvsarak Jezu Diat hem 18 versanchem lamb gaion Bhag. Francis Xavierachea manak, tachea 14vea Kuddichea dakhounne vellar, (1984-85) vorsa te dakhovnnecho hoch vixoi monant dhorun rochlem.
 
10 vorsam uprant 15ve dakhovnne vellar te dakhovnnechea vixoiak dhorun anik ek gaion tannem rochlem. Visvasacho Dis, Sang Kiteak Ailai Balla ani Mariechea Khandar Nhidla him tannem rochlolim poilim Natalanchim gitam asat.Uprant Tuji Povitrtai, Tum Mog Moguch Deva, Patok Mhojem Kedem, Mornnantlo Jivo Zalo, Nirbhagi Amchim Kallzam, him tachim poilim Pirachit kallachim gitam.
 
2015 vorsachea Janer mhoineant Fr Jose Vaz hea poilea Goenkarachea santponnachea vellar, Jose Vaza, Amchea Bhava git Fr Vasco-n rochlem zaka Fr. Joaquim Loiola Pereira hannem songit bosoilam..Hem gaion Papa Saib Francis hachea hajerint gavpant ailem. Konkani film Enemy hantunt Fr Rego-n Themegit rochlam. Konkanichea vavra khatirtraka 2005 vorsa Dalgado Konkani Akademicho puroskar favo zala. Tacho sorgvas tannem ghoddlolea Punnechea Ishaprema Niketanant Fevrerache 17ver 2021 vorsa zalo. Tachea atmeak sasnnanchem sukh favo zavunk amchim prarthona.

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields