Aiz famad Konknni machiechea comedian Titta Prettocho vadd’dis. Taka zolmdisachim hunhunit porbim diun tachea vixim lekh vachunk ditam: Titta Pretto hannem tiatr molleant famad fokanner mhunn nanv melloilam. Tacho zolm Janerache 4 tarkher 1933 vorsa Tito Mathias Estaphanio Preto nanvan Holdonnem ganvchea Lakddem vaddeant zalo ani to sorgest Alfred Rose hacho boglecho xezari.

 

Tacho Disgras tiatr zo somplolea famad Minguel Rod hannem digdorxit kelolo ten'na tera pavtt dakhoilolo asa. Tea uprant tannem khas digdorxon kelolo 'Atanchim Kazaram' ani uprant 'Mogak Lagun' hevui gazlole asat. Mogak Lagun tiatrant tannem Rofin hachi vollokh korun dili ani tantuntlo Hula Hoof nach lok ozun iad kaddtta. Tech porim tachea Soitanachi Tallnni zantunt famad filmi nachpi Sudhas Thakur hicho aspav aslo hovui tiatr nanv zoddunk pavla. Hache xivai 'Pal Tum Chol Ghora' hea tiatrakui taka xabaski favo zaloli asa. Tachea her tiatranchim nanvam 'Bomoichi Bail' ani 'Vhoniek Lagon' zavn asat. Hi tachi vhoddvik ani vollokh.

 

Tannem machier poilem panvl 1949 vorsa dovorlem. Tea kallachea A. M. Bengalu hea tiatristache 'Chikott Pakott' tiatrant Titta Pretto hannem fokannerachem patr kelem. Hache uprant Titta baban fattim vollon pollounk na ani, fuddem tanch marit ravlo. To sogllea khampea digdorspeanchea tiatrant nhesla zoxe porim C. Alvares, M. Boyer, Jacinto Vaz, J. P. Souzalin, Saib Rocha, Prem Kumar, Al-fred Rose, Kid Boxer, Remmie Collaso, Minguel Rod, Rico Rod, Ophelia, Bab Peter ani her. Satth vorsam odik tannem Konknni machiechi seva kelea ani ozun korit asa. Tannem ostorechi partui keloli asa.

 

Kantaram ghoddpant ani gavpant tannem uxarkai dakhoiloli asa. Ekoddea kantaram modem 'Mogan Poddon, Santak Korta Rozar, don’t won't Worry be Happy, Goa Amcho Ganv khub gazleant. Duettam modem Ragdda Pettis, Passport hantunt tannem nanv zoddlam.

 

1961 vorsa Delhi xarant tiatr korpak to poilo tiatrist zavn asa toxench Mumboint kheddea ganvamni tiatr machier haddunk tannem dhaddos kelolem asa. Tache tiatr Belganv, Savontvaddi, Calcutta, Pune zalole asat. Tiatrache kontrad gheun tannem tiatristank Mumboi, Pune, Nashik, Ahmedabad bhonvddaileat. Sorgest Alfred Rose hannem Titta Prettochi machier sangatak ravun tokhnnai keloli asa. Survatek, apnnacho poilo 'share' fokot 15 Rupiancho aslo ani to divpi nanvosto sorgest J. P. Souzalin tiatrist zavn asa mhunn sangta.

Tannem Amchem Noxib, Nirmonn, Boglantt, Kortubancho Sonvsar ani Girestkai cholchitramni bhag ghetla. Toxench Hindi Film Love in Goa hantuntui to dista. Tin kantarancheo kesetti mudraileat zanchim nanvam Retired Tarvotti, Don't Worry Be Happy, ani Goa Amcho Ganv. Toxench Guneanvkari Konn? hi video CD bazarant ghatlea.

 

Tachi boreantli bori tokhnnai taka Konknni machiecho Vasco da Gama mhunn pacharun kelea jem nanv taka famad tiatrist John Claro hannem tiatr Bharotant zaite kodden korpak dhaddos korta dekhun dilam. Adleo iadi tajeo korun tannem machieveleo kaim ghoddnneo sangleo teo mhojean tumche. meren pavoilea bogor ravunk zaina. Ek pavtt, C Alvares hacho 'Honrad Goenkar' tiatracho proiog Abu Dhabi eka chitrghorant tharailolo. Vosreant tiatr pollounk upatt lok bhorlolo ani tiatr suru zavpacho aslo. Konxeak aslolea Titta babak dusrea konxeak savn ulo marun apoilo. Tittabab dhanvun vetanam kallokhant taka machier aslolo burak disunk na ani to bhitor borech futt khala poddlo zoim bhirankull kallokh aslo.

 

Titta baban bobatt marunk suru keli punn ti konnakuch aikunk ienam zali karonn to boroch sokla aslo ani tiatr pollennar tiatr suru kor mhunn aroddttale. Kaim vellan konnem tacho tallo aikolo ani taka sodunk dhanvun vetanam tovui tea burakantlean khala poddlo. Atam tisro monis zo taka sodunk vetalo takai tea burakant giraslo. Uprant tankam tigaimkui voir kaddle zankam thoddo mar lagun tanchim ghoddialam sogllim nisontton zavnk pavlim. Uprant karbhareamni tiatr bond dovorlo ani chovkoxi suru keli. He ghoddnnenk Lagun karbhareamni sogllea tiatristank novim ghoddialam bhettoilim.

 

Sorgest Alfred Rose hachea 'Dotor Advogad' tiatracho proiog Raiache lgorje lagim zatalo thoinchi hi dusri gozal. Poilech pavtt thoinsor lakddache machie bodla lokhnnachi machi ubhi keloli. Tea kallar vijechi vevostha nasli ani petromax upeg kortale. Tiatr chalu astana ektto petromaxak pomp martalo. Chukon petromaxachem spirit bhair sorlem ani taka uzo lagun ujeachem agttem machier aslolea tiatristam fuddeant vochunk laglem. Fuddem aslolea Titta baban vonddov ghalun tern chukoilem punn fattlean aslolea Rico Rod babachea angar poddlem ani to hulpunk laglo. ltlean prekxokam modlo Aristides Dias tiatrist mukhar sorlo ani tannem aplem khomis Rico babacher uddoilem ani ho uzo unno kelo.

 

Taka favo zalolea tosripam modem ul'lekh korpa sarkhirn The Goan Review, Gulab, Coca Cola Great Goan Performer Award ani Dalgado Konknni Akademichem zavn asat. Tiatrachea 125 vorsachea suvalleant taka sonmanit korpant aila. Titta babak lamb auk ani tannem machier oxich progoti korchi mhonn mojem magnnem.