Thursday, May 30, 2024
Niz Goenkar
Latest News

ANTHONY MENDES - Ek Famad Vinodi Kolakar – Bor: Isidore Alexander Dantas
Monday - Jan 1, 2024
ANTHONY MENDES - Ek Famad Vinodi Kolakar – Bor: Isidore Alexander Dantas
Aiz famad tiatrist sorgest Anthony Mendes hacho zolm dis.Tea nimitan tacher boroilolo lekh tumkam vachunk ditam. Anthony Mendes hannem hansovpi kantaram gavun ani Amchem Noxib' filmant vinodi patr korun prekxokanchim monam jikhleant. To Moddganv, Dezembrache 28ver 1920 zolmolo. Chovda vorsancho astana ghorantlea eka kazarak lagun tanchea ghorcheank Mumboi vochpak poddlem. Anthony lhan aslolean taka vhoronk tim soddi naslim. Punn Anthony-n tankam, vhortolea ghoddeanchea gaddien kollonastana uddki marli. Uprant tankam to tanchea sangatak asa mhonn kollun ailem. Ten'na tim Mumboichea Girganv margachea Gaivaddi vibhagant ravtalim.
 
Tachem xikop Mumboichea Girganvantlea St. Theresa iskolant Matrik meren zalem. Iskolant astana to nattkuleantleamni bhag ghetalo ani taka eka nattkuleant pageboy-chem patr dilolem. Tanchi ek soiri Pai tiatrist sorgest Joao Agostinho hanchea kuttumbant kazar zaloli ani ti Anthony ravtolea ghora lagsar ravtalo. Pai tiatristan tachi fixalkai vollkholi ani tannem taka 1936 vorsa zalolea aplea `Khapri Chakor' tiatrant ek lhan part dili ji tannem taddak uddoili. Hea khatir tannem taka uprant aplea sogllea tiatramni ghetlo. Princess Theatre Bhangwadi zaka tiatristanchem porsum mhonn vollkhotat thoim zalolea tachea Vavraddi tiatrant taka hoddekarachi part dili ji tannem sobhoili.
 
Survatek to sobheo kantaram gaitalo. Kaim tiatrist adim Inglix-Konkani kantaram gaitale zoxe porim Alfred Rose, Kamat de Assolna. Anthony Mendes hanneim Inglix-Konkani kantaram gailim zachim nanvam Khaparika Banja ani Wonderful Child zavn aslim jim lokak avoddlim. To aple bhumika vo kantar kortana soglloch voddttalo ani taka lagun taka 'Spring Man' nanv favo zalem. Kalsanv voir kaddop ek tachem sodanchem aslem zaka lagun lok taka tallio pettoitalo. Tannem sador kelolo poilo tiatr 'Panddu Barber' zavn aslo zo 1940 vorsa tannem dakhoilo. Tannem tiatra khatir aplea jivitachim ponchvis vorsam bhettoilim ani pondra tiatr boroile. Tachea her tiatranchim nanvam'Artimiz, Goenkar, Boborji vo Kuzner, Pensanv vo Tensanv, Kunbi Irmanv, Dusreponni kazar, Tikli Sun, Vhoniecho Jurament, Editorachem Noxib, Girannacho Put, Bekar Zanvoim, Road to Mapusa...'zavn asat. Nimanno boroilolo tiatr to dakhovnk pavonk nam zachem nanv Bomoicho Dada zo uprant tachea bhurgeamni—Felix, Derrick, Xavier hannim sador kelo. Tachea tiatrache vixoi noitik totvancher adarit asle.
 
To tiatrak sodanch adim-fuddem hajir astalo. Kamak to Brilliant Battery Service komponen aslo ji eka Gomes nanvanchea Goenkaranche malkechi asli. Thoim tannem morosor sirvis keli ani tea komponecho bhagidar zalo. Hi komponi Gowalia Tank hangasor asli.
 
Tachim kantaram amkam rikorddancher aikunk mellttat zanchim nanvam Handdio Ghansing, Chovthi Bail, Everbright, Dadlo Bail, Il'lo ll'lo temp, Inglez Talking, Loving; Mest de Sal, Magnese Firoi, Mogachi Science, Respeit Man, Sodd Vatt tea Mogachi, Taxi, Kunbi Onton ani Jaki... Him kantaram Akaxvan-nicher vitraileant ani tim lokak ekdom borim lagleant. Tacho omor ugddasacho obhinoi Amchem Noxib Konkani filmant vinodi patr korun zalam. C. Alvares-ak hea filmachea kolakaranchi nivodd korunk sanglolem ani tannem taka favo tern patr divun tern film vinoda khatir nanvloukik zavnk pavlem. Hea filmant to Antonette-a sangata vinodi patr korta tantunt amkam hansovpacheo ghoddnneo pollounk melltat.
 
Tech porim to tea filmantlea don kantaramni porzolltta zanchim nanvam Bheknnaita Pai ani Mogachem Tarum. To aplim kantaram khaxea boroitalo. Taka machier ailo mhonnttoch pollovnuch talliancho ievkar favo zatalo kiteak to bhov fixalkaiecho aslo. Tannem Konkani machi kantar korun, obhinoi korun, kantaram rochun, tiatr borovn, vinod korun sobhoilea. Taka obhinoiachem konnech proxikxonn divnk nam. Taka songitacheim xikxonn naslem punn songita khatir taka bore kan asle.
 
Tachea jivitantli boreantli bori ghoddnni Amchem Noxib filmant bhag ghevop zavn asa. Jivitantli vaitt ghoddnni vichitr duensacho bolli zavn moronn ievop zavn asa. To aplo favlil’o vell kantaram ghoddun ani tiatr borovn sartalo. Tannem khoddegant digdorspeam khatir kam kelam zantunt Joao Agostinho, J. P Souzalin Anthony D'Sa, C. Alvares aspavtat. Duetam to Mariquin, Andrew, Master Vaz, Star of Arossim, Remmie Collaso sangata mhonnttalo. Taka gaichea masachea jibecho prat ekdom boro lagtalo. To Inglix toxench Konkani nemallim vachtalo. Tachea Felix, Xavier ani Derrick bhurgeamni tachi porompora chalu dovorlea. Xavier halinch devadhin zala.
 
Alfred Rose hannem tache voir ek kherit kantar rochlolem jem tachea mornna uprant 'Bomoicho Dada' tiatrant gavpant ailem. Mehboob Studios hantunt Amchem Noxib filmanchem chitronn pollovn tachea sobhavik obhinoyachi tokhnnai Hindi film kolakaramni kelea. Amchem Noxib film dakhovpachea kaim mhoineam uprant to chodd duent poddlo. Eka party-ntlo porot ghora ietana to sarko hollduvo disunk laglo. Taka P.U.O (Pyrexia of Unknown Origin) hi arombh vollkhonk zainasloli pidda zali. Angan mozbut asloli veokti sarki haddkutti zavnk pavli. Atth mhoine to piddent koxttovlo ani xevttim Marsache 21ver, 1964 vorsa Mumboint somplo. Tachea interrak bhorpur lok taka argam vompunk hajir aslo. Hea tachea omor vavrak amcho solam.
 
 

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields