Konkani tiatr palkavoilem tannem apleak vhelem tache poros khub ogllem tannem Tiatr palkak dilem. Oslea tiatristank lagunuch Tiatr Palk fuddem ttanch marun zoitache paundde choddonk laglolean tanchea koxttanchim follam aiche tiatrist chaktat. Oslo ek ‘director’ mhollear ‘King of duets’, ‘Ace Director’ ani ‘Evergreen Hero’ mhonn birud zoddlolo C. Alvares. Tannim roilolea rukhachim follam fuddlie pillgiek chakunk mellche khatir aichea tiatristamni hea rukhachi, mhollearuch tiatr palkachi zotnai gheunk zai.

 

Aiz, Pai Tiatrist, sorgest João Agostinho Fernandes, hancho zolmdis mhonnttoch ho chuttkulo (anecdote) hanv aichea tiatristank bhettoitam ani tatuntlean tannim kitem tori lisanv xikon gheunchem mhonn opekxa ballgitam. Hi ghoddnni mhaka tegam tiatristamni – Alfred Rose, (professional) Custodio Rebelo ani Rio Rosa (amateur) - tin veg-vegllia prosongamni (occasions) ani tin veg-vegllia suvatamni sangloli. Ticho attap mhollear zori João Agostinho Fernandes zaun asa ‘Pai Tiatrist’ tori eka kallar C. Alvares vortolo respetan mandlolo bapui vo apurbayecho irmão tiatristancho. Tachem utor konnuch khala poddonk dinasle, vixex korun tachea ‘non-alcoholic’ gunnak lagun. Soro pieon jivit ibaddttolea zaitea zonnank tannem boro rosto dakhoun nitt margan haddun te vhodd tiatrist vo vhodd veokti zaunk pavle. Tantuntlo eklo mhollear sorgest Tony Cabral (Ophelia-cho bhav). Hachi khatri kortolim aizui amche modem Antonete Mendes, Cyriaco Dias, Jessie ani C. D'Silva, adi asat. Sogott somplolea tiatristank sorginchem raj favo zaum mhonn magtam.

 

Milton Fernandes nanvacho ek tiatr digdorxok aslo. To Dhobitalao kuddant ravtalo ani urben tiatr boroitalo. Tiatr vevharik mollar palkar haddttanam to aplo tiatr digdorxit korunk ‘professional’-ak ditalo ani aplea tiatrant thodde ‘non-commercial’ tiatristam vangdda sogllea nanvadik ‘professional’ tiatristank ghaltalo. Tachem hem vevharik tiatrachem gonnit okhondd aslolean tache tiatr ‘houseful’ ani hitt zatale. Tannem Mumboint oxe sumar sov-ek tiatr dakhoileat.

 

Oxench Dhobitalao ek tacho tiatr suru zaunche adinch ‘houseful’ zal’lo ani ‘green room’-ant kolakar ‘make-up’ kortanam, Alfred Rose-an apleak tachea adlea tiatrant ‘share’ mellovpant kastig zal’lea karonnan Milton-ak kuxik vhoron luhan sanglem, ‘Director saib, tiatr suru zaunche adim mat mhozo ‘share’ di, magir khottkhott naka.” Rubaban bhoron Milton-an kitem mhunnchem? “Irmão, tum gelear zata.” Alfred Rose thondd poddlo khoim. Kuxik C. Alvares boison aslo, tannem hem ‘kuchu-kuchu’ korun ulovp zal’lem aikolem. Tea somoyar C. Alvares ani Alfred Rose hanchem natem borem vosonaslem. Dekun Alfred Rose ogi poddlo chintun apleak C. Alvares, adarak euncho nam. Punn utthlo C. Alvares kodelivoilo ani Milton-ak fuddo korun vicharlem, “tunvem kitem mhunnleim? Porot mhunn…” Tori Milton-an teach rubaban sanglem, “Irmão, to mhunntta apleak tiatr suru korche poilim ‘share’ di mhonn. Hanvem sanglem taka to gelear zata mhonn.”

 

“Hoi?, oxem? Tum kitem tiatristancho sumar kortai?” Uprant her sangati tiatristank fuddo korun C. Alvares-an mhunnlem, “Cholat sogle, ‘make-up’ kaddat ‘pack korat’ ami cholia. Direkttorak ami gelear zata khoim!” Tech vellar koddkoddon Milton dimbier vochon C. Alvares-acho paim dhorun, ‘guneanv bhogos irmão’ mhunn, paim poddlo ani rokhddech Alfred Rose-achech nhoi punn tiatrant bhag ghetolea dor eka tiatristache ‘share’ thuinchea thuim farik kele.

 

Hi ghoddnni amkam kitem xikoita? Mon’xam modem ontoram uprastat ani vostat. Vosondi. Punn tea ontorank lagun ami amchea ekvottak ver eunk diunk favonam. Pelea koddem aplem zullonam mhonnun tachie oskotaie vellar tacho faido ghevop sarkem nam. Hi vangnnuk bhenkreanchi (coward) vortota. Monacho vikas zal’lo (matured) monis toso vagonam.

 

Ek tiatr ‘gondde’ korun fulonam taka kola zai, taka tiatristancho ekvottit sohokar zai. Aplea mon’xak samballunk xikonk zai. Ek tiatr ful’lo mhollearuch tiatr ani tiatristponn ful’lem mhonn mandun ghevpachi xokti ani tank aichea tiatristam modem vosonk zai. Vosoiat! Eka tiatristak okman to sogott tiatristank okman mhonn somzonk zai. Tiatristanchie ‘Wikipedia’-cher zanv ‘Directory’-cher nanv ailem mhonnon vo Tiatristponnacho Puroskar gavlo mhonnun tiatrist zainam! Tiatristponnachi mhollearuch ‘Pai Tiatrist’ vo C. Alvares ani her oslea tiatristanche gunn tujeant upzonk zai. Tednam Tiatristancho sumar korunk konnuch dhaddos korcho nam! Sogott tiatristank khuxalbhorit ‘Pai Tiatristacho Dis’ aunddetam.