Don’parchem jevonn zal’lem. Lapittachi ghorkarn’ khattir bosun, kedov porian ‘WhatsApp’-ar ailole son’dex topastali. Dusrie vatten amcho ixtt Lapitt, tiatrachia jairatin pan polletalo. Kitem tori tachie nodrek disti poddlem ani tannem soroll mhollem. “Tiatrak vochum-ia nhoi FALEAM?”

 

Gel’lim char-panch vorsam tiatracher bohixkar (boycott) ghalolea mon’xan, auchit tiatrak vochpachi itsa dakhoiloli mhonn tachi ghorkarn’ motte dolle korun visvas naslolea porim tachea mukhamollakuch polleunk urli. Ticho thottaklolo sobhav Lapittak gupttim sango, tannem kitem tori novlanchem kelam mhonn. Punn gelelim panch vorsam Lapitt tiatrachem dar kiteak visorlolo? Ani tache karann….

 

Adle porim dorjedar borop nam, borea moralachi kantaram aikunk mellonant, adim vinodi kolakar machier dislearuch lok hansun mortalo ani oxie toren adle zaite prokar atanchea tiatratant chuktolean, amchea ixtt Lapittan, gel’lim kitlinch vorsam tiatrak vochpachem nakarlolem. Ani chodd korun moriadi bhaili vinodi bhumika, monantlean vitt haddtolean, tannem tiatracho vosro soddun dilolo. Punn aiz vinodi Ambe-chea tiatrak vochonk tachea angant oglli-veglli umed ekttaim zaleli. Orxim zalear, vinodi Ambe ek sadi vinodi bhumika korun lokak ansoupi ani Lapittacho monam posont avddecho vinodi kolakar aslo.

 

To apnnachea nidpachea rumantlean bhair sorlo, ani tiatr-holantlea tikett ‘counter’-acher fon kelo. Boreaxea zagear don tiketti dovrunk sanglem. Ghorkarn’nik nesonk favo titlo vell aslo dekun, to nhannient khadd kaddunk gelo. Zaitea tempan tiatrak veta. Mhunntoch, lagxile-poixile tache ixtt taka tiatr vosreant porot polleun ojap zatele. Tankam koxem kitem sangchem tem chinta astonam, tannem ‘bed’ rumachem dar ugtem kelem. Zalear? Tachi ghorkarn’ toklier chador uddoun sust nidleli. Taka dislem, apnnachem kadd zata mhollear ti neson toiar zateli. Tichevelem chador oddun tannem mhollem.

 

“Hanvem tuka sanglelem tiatrak vochum-ia. Punn tum…?

“Kitem? Tunvem maka sangleim tiatrak faleam vechim mhonn?”

“Saiba bhogos”, Lapittan tokler hat marlo ani fuddem uloilo. “Tiatrachem nanv FALEAM”

“Hanv khoim zannam? Maka dislem, ami tiartak faleam vetolim. Dekun hanv nidlelim”

“Chol-chol veguim nes”

“Tum zannai maka nesonk vell zai”

“Ami kazarak vochonanv. Tiatrak vetanv. Sottatt nes”

“GET LOST. Hanv enam”, ti portun chadra bhitor gheli.

Ticho avddicho kolakar, ‘Get Lost’ tiatracho boroupi-digdorspi mhonn sanglear, jerul tea tiatrak voronk ti agro korteli. Aichea tiatrak vochpachi umed tachech chukin jirli mhonn to niraxi zalo. ‘Old Spice’ (aftershave lotion) khaddak lainastanam, ani battli mezar dovortanam, tacho mobile vazlo. Tacheo tiketti toiar asat ani tiatr suru zaunk anik tin minutam asat mhunn dusre vattentlo monis uloilo. Dusro upai nasun ani tiketti ‘cancel’ kor mhonn sangonastanam tannem mhollem ‘WRONG NUMBER’

“

Back

No comments posted...