Tunvem nistem dilear, tum taka ek dis khavoitolo. Taka nistem marpak vo gorounk xikoilear, to jivitbor khatolo. Oxem tumi khoim tori vachlam astelem. Rikamo vell sarunk, adim amche zantte toxe tornatte zallam gheun nodint ani doriant masli martale. Gori gheun nistem gorounk vetale.

 

Kaim zonn piknikechi vevostha korun apnnachea kuttumba sangata thoddo vell moujen sartale. Goroun meulelem nistem thoinchea thoim ujeant bhazun khatale. Chodd nistem zallak kivam pagerak sampoddlear, thoddem nistem xezariank saguad kori. Punn kednanch tem nistem vikun amchea lokan poixe korunk nasle.

 

Goeant eun biradd korun ravtolea bhailea lokan, amchio borio sonvoiom apnnaileo. Tannim gorounk suru kelem. Zallam ani her hatiaramni maslli marun, ganvantlea tintear vikunk suru kelem. Ani atam choddan chodd nistem marpi vo gorovpi bhailea rajyantlo lok amkam dista. Tea lokan ek dhondo koso apnnaila. Dekhun funkott khatelea amchea adlea chhondak (hobby), serkaran Goa Marine Fishing Regulation (Seventh Amendment) Rules 2023 ho kaido kela.

 

Atam tuka gorounk vo pager marunk ani her nistem dhorpachea hatiarank licence kaddchem poddttolem. Hem aikun zaiteank ‘shock’ koso zala. Maslli gorounk veteleamni khuinchea zagear goroitele tem Nustea Khateant aplem nanv nond korunk poddttolem. Ani ek funkottchem dennem amche allsaien bhaileanchea hatant diun, ami amcheach paim-ar kuradd marun ghetli.