Aiz Febrerachi 4 tarik. Goeam khatir itihasik dis. Punn tea itihasachem Goenkarank motteponn nam. Aiz Goeam khatir obhimanacho dis. Punn Goenkaran tea obhimanak mohotv divpachi khuxi nam. Aiz, 1987 vorsa, Konknni Goenchi Rajbhas porgottlolo dis. Punn Goenkarank hea disachem vhoddlem-xem ani vegllem-xem kainch disonam ani bhogonam. Tanche khatir, vorsantlea 364 disam ani hea disa modem kainch ani koslench ontor nam. Karonn samkem sompem – Goenkarank apnnachie bhaxechem, apleponn nam, motteponn nam, obhiman nam. Donuch utramni sangtolo zalear, kainch nam.

 

Konknni Goenchi bhas korunk, tachea pattlean 333 disanchi chollvoll asa. Goenkaranchea tore-torechea koxttam-tiagancho itihas asa. Att zonnachea jivanchea luksonnachem bolidan asa. Ani hea soglleam modem, Konknni Rajbhaxecho man diunchea vellar, Romi lipik ghat kelo tacho legit, visrunk zainam toslo itihas asa! Konknnichie Romi lipintlea lokachea nettar, bollgear ani forsar Konknnik Rajbhas korunk fuddem kaddtoch, ti Nagorintlean Rajbhas keli. Konnem? Romi lipicho dves korpi muttbhor lokamni. Aiz hech lok Romi lipintlea lokak kuxin dovrun, Konknni mollar soglle torechim mananchim podam bhogtanam, ekameka modem puroskar vanttun ghetanam ani duddvam khatir Konknnichea nanvan mukhar dhanvtanam distat.

 

Rajbhaxecher adarun Goeank Ghottok Raj (statehood) dilem. Punn aiz moza oxi zalia, Konknnik Rajbhas kortanam Romi lipik ‘konko’ dakoilole, bhaxechea ani sahitiachea nanvan kariavolli zatat thoim, Romichem nanv ghenastanam bhaxek koso mar boslolo asa to vegllie toren sangtanam distat. “Lok Konknni zai mhonn fokot utramni sangta. Ami dor mollacher Konknni vaprinanv zalear, ami Konknnichea-i zhuzant hartoleanv. Amkam ghottok raj mell’llem tem fokot Rajbhas Kaideak lagun mell’llem. Ami amchi bhas samballinanv ani tichi udorgot korinanv zalear, ami amchi bhas luksonn zatoleanv.” Konknnichie Romi lipicho dves korpi eklo Nagorivalo, mukhel soireachea natean ‘Hyderabad Literary Festival (HLF) 2023’-chea ugtavnniechea dobajea vellar uloilo. 

 

Nagorivaleank Konknnichie Romi lipicho dves asa mhonn, Goenchea Rajbhas Kaideant ‘between the lines’ vachunk mellta hem mat khorem. Rajbhas Kaideant Moratthik zago dilo tachi Nagorivaleank koslich oddchonn zaunk nam; punn Nagori vangdda Romi lipi-i aschi, oxem mat Nagorivaleank kednanch disunk nam. Aiz Goeant Konknni konnak naka, tache pattlem hem-ui ek karonn asa. Taka-i hech, Romi somazak kikont korpi Nagorivalech zababdar asat.      

 

Aiz Goeant bhaxechea mollar, Konknnichie Nagori ani Romi lipichea nanvan futt poddloli asa. Tie futtik, dusre konnuch nhoi, Romintlea lokacho goir-vapor korun, tankam kallokant dovrun ani xevttim tankanch ghat kelole Nagorivale zababdar asat. Konknni bhaxechie chollvollik tollmollicho, khoraiecho ani jiv luksonn zavpacho itihas asun porian, Konknnik Rajbhaxecho dorzo ditanam todd’ddokam kelim. Oxi todd’ddokancho vixoi tharloli Nagori lipi aiz Goeant konnak naka zalia. Ji lipi konnench kednanch mandun gheunk nam, tika okosmat konn apleponn dakoitolo? Lipi zobordostin thapli mhonn tantuntlean koxi ani kiteak mhonn udorgot zatoli?

 

Rajbhaxechea nanvan Nagorik ‘official’ angvostram nhesoilim mhonn tika ratiam modem sodd, aiz 36 vorsam uprant legit ti konnak zai zalia? Moratthik rajbhaxecho dorzo dilear Konknnik mar bospachi bhirant asli dekun, Konknnik Nagorintlean to dorzo dilo thoinch Konknnik mar boslo. Tea maracho porinnam’ amkam dista. Aiz hi bhas, sorkar onudan dita, hie bhaxentlean podam ani puroskar melltat titlea purtich zai. Tache poltoddi ti konnakuch vokhdak fukott porian naka. Svota Nagorivaleank legit naka. ‘Konknni mhollear Nagori lipintlean boroiloli Konknni’ oxem apnnachea svartha khatir Romi lipik bhairaunk ‘definition’ diun legit, tanche kodde itihasik Rajbhaxechea Disacho dobazo sodd, aichea disa sado ugddas legit korunk ghoddunk nam.

 

Goenchea Rajbhas Kaideant fokot Nagoricho aspav kelo, torui Nagori lipin aiz Konknni mollar koslech dive pettoilole disonant. Khorem mhollear, Nagori Rajbhas Kaideant ghalche poilim, Konknnicho zolltalo to porzollit divo atam khoinchea-i vellar palonk sokta, ani Konknnicho xevott-ui zaunk sokta!

Soɴ'ᴠᴀʀᴀᴄʜɪᴍ Sᴜɴɢᴛᴛᴀᴍ