Ostoream modem Konkani tiatrache machier bhorpur iogdan korpi Ophelia bai zaun asa. Pon'nasachea dosokant tinnem tiatrache machier aplem pavl dovorlem ani aple bhumiken tiatr pollennarank dipkaile. Ticho obhinoi sobhavik zalelean ti prekxokanchim kallzam jikhunk pauli. Tichim choddxim gitam tizlolo tiatrist sorgest C. Alvares hanchea sangatak asat ani tim ozun lokanchea vonttar kheutat, hem koutuk korpa sarkem asa. Ophelia baiecho zolm Ambirna, Socorro, Porvorim, Novembrache 8 tarker 1938 vorsa zalo. Tichem purem nanv Clara Marciano Ophelia Cabral. Ti nanvostea tiatrist Mohanachi bhoinn.

 

1954 vorsa Ophelia poilech pautt tiatrant nesli. To tiatr Mumbointlea Mahim vattharantlea A. F. Rod hancho zaun aslo. Tiatrachem nanv Opurbaiechi Sun aslem. Hea tiatrant tinnem ogunni sunechi part koddok uddoili. Vevsaik machier ti C Alvares hanchea Avoicho Xirap hantunt disli. Tinnem, apleo bhumika jiu laun keloleo asat. Master Vaz-achea Malgoddo Put Fulgoddo hantunt pixe ostorechi, C Alvaresachea Mavoddechem Sutt ani Ken'na Udetolo to dis? hantunt kudd'di ghorkan, M. Boyer-achea Besanv tiatrant, C. Alvares hanchea Sezari Kombo tiatrant zogddekarn, C. Alvares hanchea or’rad Goenkar tiatrant pixi; heo bhumika ugddas urpa sarkeo zaun asat.

 

Dr Simon C. Fernandes hanchea Poskem tiatrant tika Dukhest Bhumikechi Ranni kitab favo zalo zo ti apleak boreantli bori xabaski koxi lekhta. Soglle mellun tinnem atthxim voir tiatramni vantto ghetla ani kantaram modem duet, trio, quartet C. Alvares, Star of Arossim, Souza Ferrao, Master Vaz, Bab Peter ani heram vangdda gaileant. Tinnem khaxea borovn digdorxit kelolo Opurbaieche Teg Khambe tiatr boroch porzollunk pavla. Hea tiatrant teg khambe C. Alvares, Seby Coutinho ani Paul Romy zaun asat zantunt tinnem matare mainchi part korun lokank dipkaileat. Tinnem C. Alvares hanchea 75 tiatramni bhag ghetla. Tiche khaxea boroilole tiatr Mojim bhurgim, Bailanchi Sobai, Respedachi Nhesovn zaun asat. Tiatrank lagun ti Bahrain, Muscat, Dubai, Beirut, Afrika, Delhi pavlea. Beirutant ti TV kariakromant dislea. Amchem Noxib, Nirmonn, Bhuianrantlo Monis, Faxi Mogachi hea Konkani cholchitramni tinnem vantto ghetla.

 

Tiatramni bhag ghetana ticho poilo share 1.50 Rupia aslo mhunn ti ugddas kaddtali. Tea kallar gaslettichea diveanchea uzvaddant tiatr zatale. Tedna mike naslet ani mottean tiatrantle sonvad tox-inch kantaram mhunnpak poddtalim, oxem sangon ti adlea kallachi zholok ubi korta. Toxench, tea kallar, tiatrak ievpak vochpak caminhao-acho upeog korcho poddtalo ani khub vell vibaddtalo, oxem adleo iadi jiveo korun tinnem maka sanglam. 1976 vorsa ti Bab Peter-a lagim kazar zali. Tanche dogainche otthra tiatr asat. Ottra vorsam ti dolleanchea duensant piddest asli ani sangati tiatristanchea adaran machier choddtali punn machier pavtoch ti sompeponnim apli part ani kantaram kortali. Ochoreamni ti bori zaunk pavli ani hachi sakxi tinnem machier ravun dilea. Bab Peterachea sangata borovn digdorxit kelolea tia-:ranchim nanvam oxim asat: Maink zai punn paik naka, konn nhoi konnacho, aiz nam faleam, Guneanv nhoi mhozo, Mijas.

 

Tichea kesettinchi nanvam Konkani Motiam, G.O.A.N., My Rose, Tourist Centre ani Ophelia. Kola Akademin 1992 rorsa tika sonmanit kelea. The Goan Review masikachem tika 'boreantli notti tosrip' 1977 vorsa favo zalea. Novembr 1998 vorsa tika Great Goan Performer Award, Comedian Dominick-achea Uzvaddant Kallokh tiatrant tika favla. 2006 vorsa; Young Goans Club, Bahrain annim tika "The Living Legend of Konkani stage" tosrip toxench Konkani Heritage, Kuwait tosrif dileant. Mum-boint Outubr 2006 zalolea Amchem Noxib, Nirmonn Nite antun ticho sonman kela. Tika Goem serkaracho Rajeo Puroskar 2013 vorsant favo zala for Thomas Stephens Konkani Kendra-cho puroskar 2011 vorsa labla. Toxench Tiatr Academy of Goa annim sonmanit kelea. 2005 vorsachea Fevrerant Bab Peter - ticho ghorkar somplo ani noich tika luskonnant ghatli punn Konkani machiek ek boro borovpi, digdorspi, kantorist, nachpi ani obhinoi korpi na zalo oxem ti mhonntta.

 

Bab Peter-achea ugddasak, ti A. M.Pacheco-chea Tukach Ravtalim tiatrant tinnern aple dhuve Babli ani zanvoim Sameera sangata bhag ghetla. Tiatram xivai tinnem somajik vavr kela. Hantunt eka AIDS piddestak duddvanchi mozot ani voizuki ilaz diupak ti khub vavurlea. Tiche dhuvecho Bablicho zolm ti aplea jivitantli boreantli bori ghoddnni somzota. Tichea motan C. Alvares hancho Sezari Kombo ho boreantlo boro tiatr. C Alvares ani Rosario Rodrigues ankam ti bore borovpi ani digdorspi koxe Iekhta. Apli bhoinn Mohana ek bori notti oxem sangta ani zorui Ermelin tiatrant nesunk poili ostori, tichea uprant Mohanan machier neson ostoreank uzvaddachi vatt dakhoilea punn ticho konnuch ugddas korinant mhunn ti khontovtali. Nirmonn hem boreantlem borem Konkani film, Jose Rod boro kolakar toxench Jacinto, Jacob ani Humbert he bore fokanner, oxem tichem mhon’nem asa. Novea kolakarank tannim kallzan thaun kolecho mog korunk ani boro vaur korun nanv zoddunk ticho sondex zaun asa. Fevrerache 19ver 2016 vorsa ti devadhin zali.