Tiatr palkachem utkruxtt kolakar Carmen Rose D’Souza, zaka tiatr palkar Miss Rose ou Carmen Rose mhonn pachartale, tem aiz 14.09.24, sokallim Mumboint devadhin zalem. Tachi pirai 92 vorsam asli. Ticho inter faleam, 15.09.24 sokallim 11 vorar, Andheri Mumboi. Carmen Rose vortoulem ut’tom’ kantorist ani partist tiatr palkachem ani tea kallachea Mumboichea lovkik digdorxokanchea tiatramni tannem bhag ghetlolo asa. Tem zaun asa famad tiatrist Joe Rose hachi bhoinn.

 

1963 vorsa Carmen Rose annem C. Alvares-achea eka tiatrant mukhi bhumika keleli. Tednam taka C. Alvares-an ‘Miss Rose’ hem nanv diun machier haddlelem. Uprant Alfred Rose, annem taka aplea tiatrant ghatlem diun nanv ‘Carmen Rose’, jem nanv tannem uprant Konkani palkar chalu dovorlem. Famad digdorxok J. P. Souzalin, C. Alvares, Jacint Vaz, M. Boyer, Prem Kumar, Alfred Rose, Remmie Colaço, Robin Vaz, adi, anchea tiatramni tannem vantto ghetla. 

 

MAUM OU KUMPAR? ho ek tiatr Carmen Rose-an boroun palkar dakhoila ani tech porim tachea bhavacho, Joe Rose, hacho ‘Guneaum Konnacho?’ ho tiatr tannem digdorxit kel’lo. Carmen Rose-an Konkani palkar ani Akaxvannicher zaitinch kantaram gaileant zaum duetam, trio ani chouke. Tannem Alfred Rose-achea vangdda gailolem ‘Dotor, Dotor gunvoll eta’ hem kantar azunui magnneam gitant aikopak meuta.

 

Aplea ghorabeache ani sirviseche zobabdariek lagun 1978 vorsa thaun Carmen Rose, hinnem Konkani palk soddun dilelem. Poilim tem Parel ravtalem ani Warden Rose (Mumboi) hanga tacho ‘cane furniture’-acho dhondo choltalo. Fattlea kaim vorsank thaun tem aplie dhuve vangdda Takshila, Andheri East vattarant rautalem.

 

Devan taka sasnnacho visov favo korum. Amchi khalti buzvonn tichea ghorcheank ani khas korun tichea bhavak, Joe Rose ani Rita-ak ani kuttumbak.