Aiz famad songitkar sorgest Alfred Rose hacho zolm dis. Tea nimitan tacher boroilolo lekh tumkam vachunk ditam. Aplea mathear xendrechem chepem ghalun ani hatant jadvachi boddi zo tiatramni satthint survatechem kantar Inglez-Konkanint gaitalo hacho vachpeank ugddas astolo. To konn nhoi punn Alfred Rose zannem, Bhangra Talleacho Gavpi (His Master's Voice komponen dila), Konkanicho Dut, Ontorraxttrik Super-star, Songit Sagor, Sultan of Swing, Music Maestro....oxe kitab melloileat. Punn Goenkarank to Modhur Songitacho Raza (The King of Melody) zavn asa.

 

Rosario Alfred Fernandes - tachem niz nanv, to Aldonachea Nivim ganvant, Agostache 5ver 1932 vorsa zolmolo. To vhoddvikechea Ambrose Fernandes hacho put zo adlo choritr kolakar zavn aslo. Ambrose Fernandesak A.M.B. Rose nanv Karachichea Jezuitamni dilolem asa. Hea kolakarak, zaka so doskanclii namna asa taka tiatrist C. Alvares hannem Junior Rose nanv dilolem kiteak to kolakaram modhem sogllea von dhaktto zavn aslo jen’na tannem tiatrant aplem poilem pavl 1943 vorsa ghatlem. Rose zannem aplea ganvank vhoddvik haddlea.tannem Goenkaram modem songitachea molleant aplem nanv kurkuttan kantovn dovor-lolem asa.

 

Tannem apnnank Alfred Rose nanv 1952 vorsa dilem. To poilech pavtt Miss Ida (Jose Mendes) hachea tiatrant dislo zoim tannem 'Kiteak jiv khatai?' kantar gailem, nanvadik tiatrist J. P. Souzalin zannem dhormik vixoiancher tiatr borovn nanv melloilam, tannem taka aplea 'Poilea Cheddeachem Baltim' Mumboichea Princess Theatre, Bhangwadi zalolea tia-trant ghetlo. To xiklolea tiatristam modem eklo zavn aslo zannem CAIIB (Benkechi vevsaik porikxa) S.S.C. uprant pas keli. Tannem thoddo kall National Overseas & Grindlays Bank Ltd. ani Larsen & Toubro hantunt ka' kelem, Tech porim Akhati desantlea Citi Bank hantunt to 1970 vorsa vavurla.

 

Ek vell oso aslo jen'na tiatrank holkea nodren polletale kiteak tantuntlim kantaram lokak zhupatteo ani bailanchea nhespachi ttika vixim astalim. Alfredan borim sobheo kantaram ghoddun ti poristhiti sudarli. Tacho poilo tiatr 'Hench tern Karann' 1956 vorsa dakhovpant ailo. Tiatr pollenaranchea nodrent bhorpi aslolean, tannem poilo-voilo man zaiteach vibhagant gattla. Mumboichea, Dhobitalao urtolea Birla Matoshri vosreant zaka odik boska asat thoim tiatr korunk to poilo. Tannem aplea kantaranchea pustokam chhapleant. Tech porim Vingans Mont Cristochem, hi Alexander Dumas hachi famad novol kanni tannem Konkanint utrailea zantunt amchea bhulvidiecho bapui Abade Faria hachem choritr por-gottlam.

 

Aplea 'Munis vo Devchar' tiatracher adarit tannem ek kadombori chhaplea. Tea vellar tannem Konkanichem poilem veongchitr (comics) pustok `Zomnintli Bhirant' uzvaddailam. 'Director Saib' hea tiatra udexim tiatrant poilo non-stop tiatr 1961 vorsa prostut kela zantunt satavis kantarancho aspav aslo jim kanniek lagu zalolim aslim jea vorvim tiatr ek film koxem loka samkar manddpant ailem.

 

Hea khatir taka Mumboichea Nogorpotichem podok favo zalam. Mother Teresa jivi astanam 1981 vorsa ticher kantar ghoddlam jem tachea Audio Cassette Album No 2 hantunt aspavta. Tannem poilo non-stop Rock Musical Show sound track machier asun dakhoila. Tiatrist sorguest Souza Ferrao jivo astana taka machier sangatak ghevun tache gunn gavun kantar kelam. Flowers hem tiatristachem poilem Inglez kantar jem tannem ghoddun gailam.

 

To Inglez kantar A Date with Daisy kantar rekorddicher kaddpak poilo tiatrist zavn asa. Hea vostad songitkaran Konkani film Boglantt haka songit bosoilam zantunt Prem Kumar tache potini Rita Rose vangdda mukhel patram kortat. Tannem hea filmantlim sogllim kantaram ekach disa record korun vikrom kela zo ozun Bollywood-achea songitkarank moddunk zavnk na, Tannem Konkani film Amchem Noxib hantunt bhag ghetla zantuntlem Inglez kantar I Lost my Heart to You tachi rochnna asa, 'Sukhachem Sopon' filmachim kantarant tannem ghoddleant. Hindi cholchitr Love in Goa hantunt tannem 'Come on Sing' hem Inglez-Konkani kantar rochun, songit divun gailam. 1950 vorsa to Rosebuds band-acho fuddari aslo.

 

Alfred, zachean sompeponnim rebek ani gitar vazounk zatalem tachim kanntaram nanvadik Hindi filmanim gavpi Mahendra Kapoor, Shailendra Singh ani Krishna Kalle hannim gaileant. Tachea thoddea tiatranchim nanvam oxim asat: Nirmonn vo Formonn, Lakhpoti Novro, Dotor-Advogad, Natalanchi Bhett, Director Saib; Hench Tem Karann, Monis vo Devchar, Rogtak Tanelolo, Mhaka Poi Tuka Poi, Amchem Nisonttonn, St. Alexio, Bhangaracho Hoti, Angovnnechi Hokol, Pesanvkar, Somes-tancho Kumpar...

 

Tannem her boroinnaranchei tiatr digdorxit keleat. To boroinnar koso atam bond zalolea nemalleancher zoxe porim Soth-Uloi ani Cine Times hancher boroitalo. Tosripam ani bhovman mell'leant tanche modem Cross International Award, Mumbai, Mungllurcho Mandd Sobhann Songitsagor kitab, Cine Times tosrip, Goan Review Award, Konkani Seva Kendr, Mhapxem tosrip, 1990 vorsantlea Kuwait zhuzacher rochlolea Kotta Kuwait kantarak bhangarachem podok; aspavtat.

 

Video World Produc-tion hannim Bhangaracho Tallo video casette tachea manak kaddlea. Toxench Tiatrachea 100vea vadd'disa nimtan tacho bhovman zala. 2002 vorsa Poilea Okhil Bharotio Konkani Songit Somelona vellar tacho sotkar korpant aila. 2004 vorsa zalolea Dusrea Okhil Bharotio Konkani Songit Sommelona vellar Ponnjechea Patto vibhagantlea EDC moidonar zalolea zageak Alfred Rose nogor nanv divpant ailarn.

 

Mornna uprant taka Rajio Puroskar divpant aila. Aldonachea Carona vibhagant eka margak Alfred Rose Marg nanv dilam. Bharota bhair tannem Africa (1960), Germany, France, Canada, UK ani Gulf, hanga lokanchem monoronjon kelam. Alfred hannem All India Radio ani Durdorxonacherui kariavolli keleat.

Alfred haka pordesant ontorraxttrik mollar dakhovnneo korunk zai asleo ani hea vixim BBC ani ATV-cheo porikxa iesiesviponnim pas zalolo punn tea kallar Goenkarank Purtugez mhonn vollkhotale dekhun pordesant ravpak oddchonneo uprasleo ani tea khatir hi ievzonn soddun dinvchi poddli. Famad kantarancho to tatporio (epitome) asun tachea podrant visrunk zainaslolem Tin Moladik Hatiaram asa jem sui, sut, kator - him tin moladik dor-jeanchim avtam dakhoita; Pai, bapaichem boreponn gaita; Goenkar vo Mungllurkar, Ami sogle Konknne, Konkani ulovpeachea zageancho ekvott iskuttaita; saddi, tiche gunn gunngun-naita; Ixtt, khoro ixtt konn tern sangta; Dev Nhidonk Na, Pormexvoracho dollo amcher sodanch asa mhonnta; Kalchi Koddi, fuddle pillgek dovorpachem sangta ani Poilea Cheddeachem baltim, Ladin ji ami adim Latim ani Purtugez bhasamni gaitalet ti Konkanint gavunk xikoita. Pain Korunk nam kantaran eka Goenkarak ud'dejok kela.

 

Tiatram xivai, Alfred-an so songit dakhovnneo keleat, kantaram ghoddun gaileant tim kantaram so hozar voir asat zantlim pondraixirn Inglezint aplea soprano talleant gailolim asat; tacheo charxim extended ani long playing records toxench 39 audio cassettes asat. Tachi 'Londoncho Mog' cassette Londo-nant mudrailoli asa 1965 vorsa tannem Rita Paes hiche kodden kazaracho sakrament zoddlo. Tannem Mahim vibhagant Alfritz Goa General Stores 1974 vorsa sthaplo zoim Goycheo ruchicheo vostu meutaleo. Inglez-Konkani cantaram modem Mandovi, Lighthouse, A date with Daisy, Luiza the Bombshell, Viva la Goa hancho ul'lekh korpacho. Hindu xoilen gailolim Bamnali Pori, Savkaralo Por, Chander Vati, Ago Mhojea Sundorea, Pato-vantli Kunvor, Goreta Gheun Gori, Logn zatam, oxim asat. Tachea mota pormonnem Konkani tiatrank fuddar asa ani to pollovpak vochun lokacho taka palov zai ani bexttench tonddachim xapotam sangunk favonam. Outubrache 21ver 2003 vorsa to de-vadhin zalo.

 

Tachea ugddasa khatir hanvem Alfred Rose-The King of Melody pustok Konkanint borovn porgottlam. Tachea atmeank xanti labhum