Faleanchea disacho bhorvanso pois asa dekun, aichea disacher visvas dovrun hanv Mukhel Montri Ukodd, mhojea monantlem uloitam. Mukhell Kendrant sot’ter aslolea sorkarachea kumpasar, amchea rajyacher boreaponnachim kupam udetolim hem hanv soputan sangtam. Tharailolea vella bhair chukun mollbar, pavsachim kallim kupam udeun pavs poddta ti gozal dusri. Ponn amchea bhonvttonim poddtolea pavsak, koso niantronant (under control) ami dovortat tem poilim uloun dista.

 

Kallea vokddancher vo ‘drugs’ ani motkeacher, kaide rakhonndaranim aptto gheunchem sap bond kelam. Nitiche dolle ugte zaleat ani kaideche hat lamb zaun, amchea sorkaran ‘beauty parlor’-ant gupteam choltolea kuddi dhonddeacher kodok bodi marlea tea pasot, Ut’tor doria vattaranle ganv povitr zaleat. Halim-sorak, ‘rape’ tokrari pulis chovker nond zalio nant. Tea khatir, amchea cheddvank meklleaponnan bhovunk bhivpachi goroz nam mhonn sangun dista.

 

Hea vorsak gormi itli choddlea, amchea purvozanim aikun nam toslio gozali aikuchio poddlio. Kalorachea dhogdhogan, Mhadeichea vatarantle ani her rananak ispa bhair hun’sann zaun uzo pettlo. Zonvarank ani mon’xancho jiv luksonnank pavunk nam mhonn, Ran Khatem khuxal. Amcho sorkar luksonn zalolim ranantlim zhaddam, porot launk ‘study’ korta.

 

Ami sodanch udar ani kallzant movall. Madei nodi vixim zaitea zannank duklam. Mhoji ‘policy’ vo bhitorlo ‘agenda’ hanvem poilim amchea mon’xank ugto korunk zai aslo. Unchle Nitisobhen vo ‘tribunal’-an nikal dila to tatpurto vo thoddea kallacho. Ek pavtti sorkaracho Pokx jikun ailo mhonntoch, amchi Mhadei amkam melltoli. Bhium nakat. ‘Mineral’ udok toiar asa.

 

Survatek hanvem sanglam. Faleanchea disacho bhorvanso pois asa dekun, aichea disacher visvas dovrun hanv mhojie monantlem uloitam. Aiz Abrilachi poili tarik. Taka April Fool’s Day mhonntat. Amche lok Fools kednanch zainant. Mhojea monantlem kitlem khoreponn asa tem tumi gilchem. Tumkam ‘fool’ korchem, hatunt hanv, nimnno!